Monday, August 21, 2017

ശ്രീരാമകഥാമൃതം ( 20 ) പൊന്മാനിന്‍റെ പ്രലോഭനം

രാവണന്‍ നേരേ മാരീചാശ്രമത്തിലേക്കു പോയി. തന്‍റെ പരിപാടികളേപ്പറ്റി പറഞ്ഞു : 'രാജാവേ, രാമനോടേറ്റുമുട്ടുവാന്‍ പോകുന്നത് അപകടകരമാണ്. ഈ ഉപായം ഉപദേശിച്ച ആള്‍ അങ്ങയുടെ ശത്രുവാണ്. രാമബാണങ്ങളുടെ ശക്തി ഞാന്‍ അനുഭവിച്ചറിഞ്ഞിട്ടുണ്ട്. രാമന്‍ ഈശ്വരന്‍ തന്നെ മാനുഷവേഷം ധരിച്ചു വന്നിട്ടുളളതാണ്. രാമനെ ആശ്രയിക്കൂ, ശരണം പ്രാപിക്കൂ. എന്നാല്‍ അങ്ങയുടെ ഭാവി ശോഭനമായി വരും. അല്ലാതെ വംശ നാശത്തിനുളള മാര്‍ഗ്ഗം സ്വീകരിക്കരുത്.' ആയുസ്സറ്റവനുണ്ടോ ഹിതോപദേശം കേള്‍ക്കുന്നു! രാവണന് അതു കേട്ടപ്പോള്‍ കോപമാണ് വന്നത്.
രാവണന്‍ പറഞ്ഞു: 'ഞാന്‍ സീതയെ അപഹരിക്കുവാന്‍ തീര്‍ച്ചപ്പെടുത്തി. അവളെ കിട്ടാതെ എനിക്കു ജീവിക്കുവാന്‍ വയ്യ. അതിന് അങ്ങു മായകൊണ്ട് സുന്ദരമായ ഒരു പൊന്മാനിന്‍റെ വേഷം ധരിച്ച് സീതയെ മോഹിപ്പിക്കണം. അവളുടെ ആഗ്രഹം അനുസരിച്ച് രാമന്‍ മാനിനെ പിടിക്കുവാന്‍ വരുമ്പോൾ രാമലക്ഷ്മണന്മാരെ ദൂരേയ്ക്ക് അകറ്റണം. അപ്പോള്‍ ഞാന്‍ സീതയേയും പിടിച്ചുകൊണ്ടു പോരാം. ഈ ആജ്ഞ അങ്ങ് അനുസരിക്കുന്നില്ലെങ്കില്‍, എന്‍റെ വാളിന് അങ്ങ് ഇരയായിത്തീരും.
ഈ ദുഷ്ടന്‍റെ കൈകൊണ്ടു മരിക്കുന്നതിനേക്കാള്‍ നല്ലത് രാമാസ്ത്രമേറ്റു മരിക്കുന്നതാണെന്നു തീര്‍ച്ചപ്പെടുത്തി മാരീചന്‍ പൊന്മാനിന്‍റെ രൂപം ധരിച്ച് ആശ്രമസമീപത്ത് തുളളിച്ചാടി. വൈദേഹി അസാധാരണമായ ആ സുവർണ്ണ മൃഗത്താല്‍ ആകൃഷ്ടയായി രാമലക്ഷ്മണന്മാരെ വിളിച്ചു കാണിച്ചു. അതിനെ തനിക്കു പിടിച്ചു തരണമെന്ന് ആവശ്യപ്പെടുകയും ചെയ്തു. ലക്ഷ്മണന്‍ ഇങ്ങനെയൊരു മൃഗം ഉണ്ടാവുകയില്ലെന്നു പറഞ്ഞുവെങ്കിലും സീത അതു ശ്രദ്ധിച്ചില്ല. ശ്രീരാമന്‍ സീതയുടെ വാക്കുകേട്ട് മാനിന്‍റെ പിന്നാലെ പോയി. കുറേ ദൂരം പോയപ്പോള്‍ മാനിനെ ജീവനോടെ പിടിക്കുവാന്‍ സാദ്ധ്യമല്ലെന്നു കണ്ടു കൊല്ലുവാന്‍ അസ്ത്രം പ്രയോഗിച്ചു. ''ഹാ സീതേ, ഹാ ലക്ഷ്മണാ'' എന്നുറക്കെ നിലവിളിച്ചുകൊണ്ട് മാരീചന്‍ മരിച്ചു വീണു. രാമന്‍റെ സ്വരത്തിലുളള നിലവിളി കേട്ട് സീത പരിഭ്രമിച്ചു. ലക്ഷ്മണനെക്കൂടി സീതയുടെ അടുത്തു നിന്നു മാറ്റുകയായിരുന്നു മാരീചന്‍റെ ഉദ്ദേശം.
*''വിനാശകാലേ വിപരീത ബുദ്ധി''* എന്ന ആപ്തവാക്യം അനുസരിച്ചാണ് രാവണന് മാരീചന്‍റെ ഹിതോപദേശം കേള്‍ക്കാന്‍ തോന്നാതിരുന്നത്. സീതാവിഷയകമായ കാമം കൊണ്ട് അന്ധനായിത്തീര്‍ന്ന രാവണന് വിവേകം നശിക്കുകയാണ്. മാരീചന്‍ ഗത്യന്തരമില്ലാതെ മരണം വരിക്കുവാന്‍ തീര്‍ച്ചപ്പെടുത്തി. ശ്രീരാമനും പത്നിയുടെ വാക്കുകേട്ട് ആലോചനയില്ലാതെ ചാടിപ്പുറപ്പെട്ടു. ഇങ്ങനെയൊരു സുവര്‍ണ്ണമൃഗമില്ലെന്നും ഇത് രാക്ഷസമായയാണെന്നുമുളള ലക്ഷ്മണന്‍റെ വാക്ക് സീതാരാമന്മാര്‍ ശ്രദ്ധിച്ചില്ല. അതിന്‍റെ ഫലമാണ് ഇനി അവര്‍ അനുഭവിക്കുവാന്‍ പോകുന്നത്. അവിവേകം ആപത്തിനു കാരണമാണെന്ന് ഒരിക്കൽ കൂടി തെളിയുന്നു.

കടപ്പാട്: ശ്രീരാമകൃഷ്ണാശ്രമം, തൃശൂർ